Se presentaron os libros ‘Paisaxes de pan’, de Anxela Gracián, e ‘A senda poscrita’, de Alberto Cacharrón

Francisco Javier Fernández Davila, primeiro premio do Certame de Poesía en Lingua Galega ‘Rosalía de Castro’, en Cornellà

Este sábado 26 de novembro, celebrouse o acto de concesión dos premios da 36ª edición do Certame de Poesía en Lingua Galega ‘Rosalía de Castro’, organizado pola Asociación Cultural Galega Rosalía de Castro de Cornellà (Barcelona) e no que se lle concedeu o primeiro premio a Francisco Javier Fernández Davila polo seu poema ‘Incendios’.

Francisco Javier Fernández Davila, primeiro premio do Certame de Poesía en Lingua Galega ‘Rosalía de Castro’, en Cornellà
os autores dos libros con Armando Requeixo quen fixo a presentacion (2)
Os autores dos libros con Armando Requeixo quen fixo a presentación.

Pola tarde, o acto de concesión dos premios foi precedido da presentación dos dous libros: ‘Paisaxes de pan’, de Anxela Gracián, e ‘A senda poscrita’, de Alberto Cacharrón.

‘Paisaxes de pan’ é unha autobiografía poética coa que autora regresa á súa infancia rural, tan paradisíaca como elexíaca, recuperada aquí como lugar de resistencia. Coa memoria como liña condutora, a aldea e a casa recíbena de novo porque, como dicía Baudelaire, “no fondo todos estamos determinados pola nenez”.

Congregadas a carón do lume, recíbena todas as personaxes que un día a habitaron. Como voceira de todas elas, a avoa Anuncia refire historias de pan e mitoloxías de noso, que invocan a Muller da Gadaña, a néboa do Chamoso e certos paxaros agoirentos. Pola súa boca fala o mundo, transcendendo o que era oco e que existe porque ela o nomea de novo. Tamén vén ao noso encontro o Home do Saco, ensinando a desafiar o medo, para descifrar logo os signos da pedra e entrar así na desmemoria. Rodeando todo aquel mundo de paisaxes de pan, eríxese altiva e fachendosa a carballeira, símbolo da beleza suprema.

O libro ‘A senda proscrita’, da man de Alberto Cacharrón e o recoñecido pintor Alexandro, combina arte, literatura e historia arredor do Camiño de Santiago a Fisterra.

Amósanos unha época na que por este camiño pasaron distintas culturas –entre elas, a celta– antes de que o cristianismo se apropiase dos seus arcanos ritos e establecese a Ruta Xacobea que coñecemos, que remata en Compostela. Xunto a el, Cacharrón achéganos coa súa literatura ás historias reais que rodean o territorio da Costa da Morte. Deste xeito, ambos, autor e ilustrador nos dan a coñecer a maxia do camiño proscrito e o misterio da ruta a Fisterra.

O acto contou coa asistencia de numeroso público, así como a presencia do alcalde de Cornellà, Antonio Balmón, que se encargou de pechar o acto agradecendo a colaboración de tódolos protagonistas do acto, significando ademais a diversidade cultural de Cornellà, poñendo en relevancia a traxectoria da A.C.G. Rosalía de Castro, destacándoa como unha das máis importantes entidades da cidade.

Pola noite e no transcurso dunha cea-convivio celebrada no restaurante da Asociación, e presidida polo seu presidente, Oliver Fernández, á que asistieron numerosos socios e amigos, así como diversas autoridades do mundo da cultura e a sociedade de Cataluña e Galicia, ademais de representantes da Corporación Municipal de Cornellà, delegación da Xunta de Galicia, concretamente Política Lingüística, delegacións doutras entidades galegas de Cataluña e do xurado do certame, composto por:

Presidenta: Anxela Gracián: naceu na aldea de Gracián San Paio de Arcos (Castroverde-1968). Escritora, tradutora, crítica literaria, animadora cultural e editora galega. Licenciada en Filoloxía Hispánica, subsección galego-portugués, pola Universidade de Santiago de Compostela.

Vicepresidenta: Ánxela Lema París (Muros 1991) Investigadora posdoutoral Margarita Salas, membro do Grupo de Investigación Lingüística e Literaria Galega (ILLA) da Universidade da Coruña e colaboradora do grupo EDILIGAL.

Vocal 1º: Alba Cuquexo, licenciada en Filoloxía Galega pola Universidade de Santiago de Compostela (2012). Master en Estudos da Literatura e da Cultura. Estudo, edición de textos, investigación estudos literarios e culturais. Universidade de Sanitago de Compostela

Vocal 2º: Armando Requeixo (Mondoñedo, 1971). Crítico literario e investigador. Profesor da Universidade de Santiago de Compostela, secretario científico do Centro Ramón Piñeiro para a Investigación en Humanidades e Catedrático de Lingua e Literatura Galegas no Ensino Secundario, é tamén coordinador de Actividades e Publicacións da Casa-Museo Álvaro Cunqueiro.

Vocal 3º: Xulio Simón Rúa (Lugo 1955). Profesor, licenciado en Filoloxía Galego-Portuguesa pola Universidade de Barcelona. No 1985, realizou o Curso de Lingua e Cultura Portuguesa na facultade de Letras da Universidade de Lisboa. En 1990 participou no Curso ‘Didactique du Français Langue Etrangère’, na Université de Paris III Sorbonne Nouvelle. Colaborador dende a súa fundación coa Asociación Cultural Rosalía de Castro de Cornellà (Barcelona), A partir da década de 1980 creou unha cronoloxía da literatura galega xunto coa portuguesa, catalá, española e a universal que abrangue do 1850 ao 2004, que se publicou como unha wiki co nome de xulipedia.com. Este traballo está aberto á participación e aportación persoal.

Vocal 4º: Luís Losada Rodríguez (Ourense 1957). Licenciado en Química pola Universidade de Santiago de Compostela. Ten traballado de mestre ate a súa xubilación, sendo entre outros responsable do Centro de Recursos de Pontevedra e Director de varios centros públicos de ensino.Ten impartido diferentes cursos de formación ao profesorado e participado en programas educativos europeos en varias edicións.

Vocal 5º: Alberto Cacharrón Mojón (Ourense 1962). Diplomado en Maxisterio coa especialidade en Humanidades. Paralelamente á faceta familiar e laboral, sempre tivo moi presente as súas tres grandes paixóns: Escritura, Deporte e Viaxes de Aventura. Esa combinación fusionouna literariamente coa edición do seu segundo libro: ‘Mi otro tiempo’. Tamén ten publicado outros libros de temática ‘Camiño de Santiago’, como ‘Iter Sancti Jacobi-el camino de Initiatus a Illuminatus’ e outros máis.

Vocal 6º: Xosé Carlos García, presidente de Xuntanza de Catalunya, filólogo, xestor cultural e condutor do programa en galego ‘Ecos da Terra’ de Radio Teletaxi.

Secretario: Xulio Couxil Vázquez, profesor. Licenciado en Galego e Portugués, xubilado. Dirixe os programas ‘Semprengalicia’, de Radio Cornellà e ‘Galegos no BAIX’, de Radio Sant Boi.

Déronse a coñecer aos gañadores deste ano 2022:

Primeiro premio: Francisco Javier Fernández Davila, de Nigrán (Pontevedra), polo seu poema titulado ‘Incendios’. O xurado destacou deste premio a linguaxe coidada con moito vocabulario creativo. Presentación e construcción moi ben elaborada. Valorando e respectando a diversidade sexual, homosexualidade, a “non femineidade”. Imaxes que representan metáforas ideais.

Segundo premio: Xurxo Alonso García, de Vilagarcía de Arousa (Pontevedra), polo seu traballo ‘A senda do furtivo’. O xurado comenta a súa musicalidade poética e sintonía versicular. Imaxes de personaxes ben recoñecibles. Linguaxe galega moi coidada, cunha relación léxica e concreción cultural creativa e de transmisión agradable.

Terceiro premio: Andrea Nunes Brións, de Marín (Pontevedra), polo poema ‘Increibel pero certa’. Este texto aporta unha reescrita moi coidada, dende o feminismo. Cultura popular. Amor non tóxico con tintes de bixesualidade. Representa un amor plural. Escrita transgresora pero non ofensiva, que vai do universal ao particular. Moderna, diferente.

Dentro do proxecto cultural e literario que a Asociación Cultural Galega Rosalía de Castro de Cornellá creou en 1986, sendo presidente da entidade Henrique Fernández Sánchez, e xunto coa edición da revista ‘Lúa Nova’ e os programas de radio ‘Sempre en Galiza’, e máis tarde ‘Galegos no Baix’, créase tamén o Certame de Poesía en Lingua Galega ‘Rosalía de Castro’, que este ano chega a súa trinta e seis edición.

A principios do ano 1987 convócase a primeira edición do certame coa finalidade de promove-la poesía galega e os novos poetas que saíran do país, e tamén como homenaxe á insigne poetisa que dá nome a asociación. Cumprindo esta tarefa desde os seus comezos ata hoxe, participaron no certame o máis salientable dos escritores que cultivan a primeira das artes da nosa lingua, a poesía. Poetas noveis, afeccionados e mesmo consagrados participaron cos seus traballos ao logo dos trinta e seis anos de vida do Certame. Compre lembrar, precisamente este ano que nos acaba de deixar Darío Xohán Cabana, que foi el o gañador da primeira edición en 1987.

Máis de tres décadas consecutivas da edición deste certame, que na actualidade conta cunha inmensa simpatía dentro dos aconteceres poéticos do país e na emigración galega, no que levan participando poetas de tódolos lugares do mundo, alí onde os galegos e os seus descendentes se atopan e cultivan esta arte literaria na nosa lingua. Coidamos que se non é un dos máis importantes editados en lingua galega hoxe, sen lugar a dúbidas, si é o máis importante que se deu na Galicia exterior ó longo da súa historia, e os mesmos participantes dannos a razón, dado o seu interese ano tras ano por participar no Certame, e segundo as valoracións dos diferentes xurados que se encargaron nestas edicións de dar a coñecer os gañadores. Consideran importante non só o número de participantes, que é moi abondoso e altamente positivo senón que a calidade dos traballos presentados ao Certame, xeralmente e salvo contadas excepcións, é dunha calidade excelente.

Pola calidade dos traballos e polos personaxes gañadores do certame, fai que o Certame neste intre goce dunha inmellorable saúde e as espectativas de futuro son engaiolantes para todos nós que estamos ao redor deste importante evento cultural galego feito en Cornellà, e o que é máis importante para a cultura galega e para o noso país. Nesta 36 edición houbo unha excelente participación de 110 traballos que aportaron 97 autores.Cer

Francisco Javier Fernández Davila, primeiro premio do Certame de Poesía en Lingua Galega ‘Rosalía de Castro’, en Cornellà