“A emigración é expresión ante o espello da realidade daquelo que fomos, somos e queremos ser”

345.408 son os galegos residentes no exterior. Todos eles fan suma do prognóstico que marca o calendario deste Aninovo; as moitas Galicias coas que construír a mellor Galicia, creando unha irmandade de común porvir.
A emigración é expresión ante o espello da realidade daquelo que fomos, o que somos e o que queremos ser. Un feito diferenciado que moito ten de autobiográfico: medímonos cos nosos semellantes, corpo a corpo, nun traballo arreo.
Aqueles que personalizaron un tempo –unidos polo sentimento da galeguidade e a espontánea preocupación pola terra– son hoxe doazón imprescindible para os que veñen e que arrastran o entusiasmo da memoria. Emprendedores, comprometidos, creativos; eles son o noso relevo, que estou certo seguirán esforzándose porque cada Casa siga sendo a de tódolos galegos.
Este ano 2010 –que amencerá baixo a universalidade do ser galego cun novo Xacobeo– dificilmente será borrado do imaxinario colectivo. Os galegos de todo o mundo estamos unidos de norte a sur, de leste a oeste, por unha liña recta e firme aglutinadora da esencia cultural, artística e humana que se concentra entre dous puntos. A imaxe fiel dese punto de encontro é o que marca o Camiño de Santiago; recordatorio do espírito da galeguidade alén das fronteiras e de que as metas se conseguen coma as acadadas por todos vós: con lealdade ás orixes, fidelidade aos valores, e algo que sempre dependeu de vós, esforzo e sacrificio permanentes.
Tras cada verba ten que haber unha acción, daí o meu compromiso, dende esta nova responsabilidade que veño de asumir, de apoiar e procurar un futuro conxunto que compromete a tódalas nosas comunidades no exterior. “Esperanza, humildade e servicio son os tributos nos que día a día traballamos para que nos distingan como Secretaría Xeral da Emigración”.
Moitas Felicidades.

Santiago Camba
Secretario Xeral de Emigración de la Xunta