El Centro Gallego de Lleida recorda o compromiso de Piñeiro coa emigración

Organizados polo Centro Galego de Lleida, que preside Xosé Terceiro, celebráronse durante o mes de maio varios actos conmemorativos das ‘Letras Galegas 2009’, que culminaron cunha conferencia sobre a figura do homenaxeado este ano pola Real Academia Galega, Ramón Piñeiro, impartida polo historiador Manoel Carrete. O acto principal de celebración das ‘Letras Galegas’ tivo lugar o 30 de maio na sala de actos do ‘Institut d’Estudis Ilerdencs’ onde o historiador Manoel Carrete, pronunciou unha conferencia sobre a figura de Ramón Piñeiro como impulsor da lingua e a cultura galega, tanto en Galicia como na emigración.

Manoel Carrete destacou do homenaxeado con motivo das ‘Letras Galegas’ deste ano, o seu compromiso coa emigración, e sobre todo coa emigración galega en Cataluña. Durante a súa disertación amosou datos pouco coñecidos de Ramón Piñeiro sobre a súa participación en eventos históricos que impulsou para ben da nosa cultura, así como a súa relación con Cataluña, e especialmente coa Universidade de Barcelona a través do catedrático Basilio Losada, e tamén co Centro Galego de Barcelona e os seus escritos na revista ‘Alborada’.
O acto foi seguido por numeroso público e a él asistiron as principais autoridades do Goberno municipal da cidade, así como o director do ‘Institut de’Estudis Ilerdencs’, Joan Busqueta.
Unha vez rematada a conferencia, a coral ‘Cengallei’ do Centro Galego ofreceu un recital poetico-musical basado en temas da cultura galega, entre os que se puideron escoitar poemas de Pondal e Cunqueiro. A súa actuación rematou coa interpretación do himno galego.
Asemade, durante o mes de maio, o Centro Galego de Lleida organizou outras actividades importantes para conmemorar o mes das ‘Letras Galegas’ dos que destacamos a súa participación na festa maior de Lleida. Así, o 11 de maio participaron na ofrenda floral ao patrón San Anastesio, á que asistiron numerosos membros do Centro ataviados cos traxes típicos de Galicia.
O 17 de maio, a través da vocalía da Muller do Centro, participaron na festa de ‘Moros e Cristiás’ da cidade, un evento histórico que data do ano 1.150, que se vive con fervor popular en Lleida e no que participan activamente as principias institucións da cidade.
O Centro Galego, neste caso, aporta a presenza galega a través dos seus desfiles e sobre todo dos recitais da súa coral ‘Cengallei’, que o mesmo día ofrecía o concerto das ‘Letras Galegas’ en  Lleida, este ano na igrexa do Carme da cidade co gallo do 50º aniversario da súa fundación.
Destacar tamén a súa participación na gran verbena dos ‘Camps Elisis’ da cidade, onde ofreceron nunha caseta produtos típicos de Galicia como empanada, polbo, lacón ou queimada.