A ‘Irmandade Galega de Rubí’ congrega aos galegos en Cataluña na festa da matanza

Xa rematando a celebración do Entroido, festividade que as entidades galegas rememoran dun xeito especial, contribuíndo así a conservación das tradicións galegas, a Irmandade Galega de Rubí (Barcelona) ten moi presente a celebracón da matanza. Por iso, do xeito máis adecuado posible, intentan facer honor a eses costumes e manter viva a chama dunha Galicia labrega tradicionalmente marcada pola subsistencia, dentro do que foi o mundo rural, e transmitirlle ese legado á mocidade, aínda que tan só sexa para que así coñezan mellor a Galicia auténtica.
A presidenta da entidade, Silvia Castañeda, á cabeza, e tódolos socios participan activamente deste acontecer, coa celebración da ‘festa da Matanza’, no ‘Can Oriol’, un dos parques máis significativos da cidade.
Como se dunha familia se tratase, segundo marca a tradición galega, dedican unha semana á matanza, despois de sacrificar o porco nun matadoiro –agora iso de facelo no cortello non se permite–. Non obstante, a celebración festiva si que a fan á antiga usanza, elaborando os productos por eles mesmos, un día para as filloas, outro para os roxóns e rematando o domingo coa degustación das viandas ó aire libre.
Ó Parque ‘Can Oriol’ acudiron o pasado día 20 de marzo, desde a alcaldesa da cidade, ata calquera socio doutra entidade galega de Cataluña, ou mesmo os veciños da vila.
Churrasco, cachola, chourizos, filloas e cachelos, por suposto galegos, e unha cunca de viño fan as delicias de calquera que guste desta festa, e son moitos os que circulan polo devandito parque.
Ademais do xantar institucional, ó que este ano asistiron ó redor de trescentas persoas, tamén hai un xantar popular no que se atopan desde a alcaldesa de Rubí Carmen García Lores, ata os directivos da Irmandade Galega, socios e amigos da entidade que degustaron estes manxares cociñados con moito agarimo polos compoñentes da Entidade Galega de Rubí.