O CEG de Madrid réndelle homenaxe ao intelectual galeguista Isaac Díaz Pardo

O Centro de Estudos Galegos (CEG) da Universidade Complutense de Madrid (UCM) –dependente da Consellería de Cultura, Educación e Ordenación Universitaria da Xunta de Galicia, por medio da Secretaría Xeral de Política Lingüística– vén de organizarlle, o pasado 26 de novembro, unha merecida e emotiva homenaxe ao intelectual galeguista, pintor, ceramista, deseñador e editor Isaac Díaz Pardo, falecido en Galicia en xaneiro deste ano.

O acto, que tivo lugar no Ateneo de Madrid, foi promovido polo Centro de Estudos Galegos da Universidade Complutense –dirixido por Carmen Mejía Ruiz– e pola Cátedra de Estudios Galegos do Ateneo –dirixido por Miguel Losada–, e coordinado por Ricardo Pichel Gotérrez, profesor-lector de galego da UCM.
Nel tomaron parte tres persoas moi achegadas á vida e á obra de Isaac, tres grandes mulleres que ofreceron os seus testemuños persoais, sentidos e tamén estremecedores da súa relación co mestre homenaxeado: María Victoria Villaverde (viúva de Ramón de Valenzuela), Inés Canosa (a alma do Sargadelos de Madrid xunto con Isaac Díaz Pardo) e mais Constanza Tobío (filla de Lois Tobío). Estas intervencións foron precedidas dunhas fermosas palabras de lembranza e de agradecemento cara ao inxente labor cultural e humano do homenaxeado por parte de Carmen Mejía Ruiz, Miguel Losada e Carmen Novoa.
Rematados os tres testemuños persoais, un pequeno grupo de profesores e alumnos de galego en Madrid puxéronlle voz a Isaac coa lectura dalgúns dos seus textos poéticos e de ensaio: Carme Lamela Villaravid (profesora de galego no Espazo das Linguas Ibéricas), Saleta González Carnero (historiadora da arte, amiga da familia Díaz Pardo e familiar dos Valenzuela), Javier Rivero Grandoso (investigador canario da UCM e antigo alumno de galego), Alba Quintáns González (actual alumna de galego da UCM) e María Sokolova (exalumna rusa de galego tamén da UCM). Os dous textos poéticos da autoría de Isaac lidos neste recital (os dous publicados na revista Aturuxo nos anos cincuenta) foron ‘Cacheno’ e ‘A unha rapaza de Fontán que me pousa de modelo’.
A continuación, o emblemático profesor e académico da lingua galega Xesús Alonso Montero pronunciou unha moi proveitosa palestra relativa á vida oficial e á obra subversiva, antes e despois da morte de Franco, de Isaac Díaz Pardo. Rematada esta sentida lembranza ao legado cultural e sentimental de Isaac, o acto foi clausurado coa intervención dalgúns dos poetas madrigalegos más destacados, algúns deles integrados no recoñecido Grupo Bilbao: Fermín Bouza, Manuel Pereira, Luz Pichel e Rafa Yáñez.
Como colofón, o público puido gozar coa voz e a melodía dun dos músicos galegos máis coñecidos, Amancio Prada, quen agasallou aos asistentes con dúas pezas poéticas musicadas de Celso Emilio Ferreiro e Federico García Lorca, esta última aínda inédita.

Centro de Estudos Galegos da Complutense
O Centro de Estudos Galegos da Universidade Complutense de Madrid é un dos 29 centros dependentes da Secretaría Xeral de Política Lingüística que conta con Lectorado de Lingua, Literatura e Cultura Galegas, e pertence á Rede de Centros de Estudos Galegos da Xunta de Galicia que integran na actualidade un total de 38 departamentos universitarios españois e estranxeiros.
É froito dun convenio de colaboración asinado xa hai 18 anos entre a Administración autonómica galega e a Universidade Complutense de Madrid. Conta cun lectorado de galego a través do que se imparte docencia de lingua, literatura e cultura galegas nas materias ofertadas dentro dos plans de estudo de titulacións pertencentes á facultade de Filoloxía (Lingua galega I, Lingua galega II e Lingua e Lingüística) e está adscrito ao departamento de Filoloxía Románica. Na actualidade, cada curso académico, arredor dunha vintena de alumnos e alumnas estudan lingua, literatura e cultura galegas nesta universidade.
Este centro é o impulsor da coñecida revista de estudos galegos ‘Madrygal’, que lle dá acollida a traballos meritorios arredor da lingua, da literatura e a cultura galegas. Trátase da única revista que desde o ano 1998 se vén publicando con periodicidade anual e que desenvolve esta temática desde o ámbito universitario español de fóra de Galicia. No ano 2012 chegou ao seu décimo quinto número.